श्रीकृष्ण जन्माष्टमी २०१७

श्रीराम समर्थ 
श्री क्षेत्र  गोंदवले येथे जन्माष्टमी  उत्सव दरवर्षी प्रमाणे श्रावण वद्य प्रतिपदा  ते श्रावण वद्य  अष्टमी (८ ऑगस्ट ते १५ ऑगस्ट)  दरम्यान  अत्यंत उल्हासात व भक्तिमय वातावरणात संपन्न झाला.  उत्सवकाळात दररोज अखंड नामस्मरण व टाळेवर भजनाचा पहारा होता. दररोज सकाळी श्री गोपालकृष्णास पवमान अभिषेक व श्रींच्या समाधिस रुद्र अभिषेक करण्यात आला.  दररोज विविध फुले व पोशाख यांच्या सजलेल्या  गोपालकृष्णाची सुवासिनींनी दृष्ट काढली.  
उत्सवात जालन्याचे श्री रामदास आचार्य यांची गर्ग संहिता यावर सुश्राव्य प्रवचने झाली. १४ ऑगस्ट म्हणजेच जन्माष्टमीच्या दिवशी मंदिर सुंदर फुलांनी सजले. विद्युत रोषणाई व रांगोळ्यांनी परिसर सुशोभित झाला. रात्री ११ ते १२.३० पर्यंत काल्याचे कीर्तन होऊन श्रीकृष्ण जन्म सोहळा साजरा झाला. त्यानंतर बाल कृष्णासाठी न्हाणी, पाळणा, आरती झाली . सामुहिक विष्णु सहस्रनामासह श्रीकृष्णास तुलसीपत्रे वाहण्यात आली. कार्यक्रम संपताना जमलेल्या भाविकांना प्रसाद व सुंठवडा वाटण्यात आला.  

१५ ऑगस्ट ला पारण्याच्या दिवशी  सकाळी गोपाळ कृष्णासमोर काल्याचे कीर्तन झाले व त्यानंतर दहिहंडीचा  कार्यक्रम झाला.  अशारितीने श्रीकृष्ण जन्माष्टमीचा उत्सव श्रीकृपेने अत्यंत आनंदात संपन्न झाला.